MOS PREK

Mos prek

nëpër tehun e mprehtë të dhimbjes

..mos!

Gjithçka po dhemb ndryshe nëpër lotët e tu.

Diku brenda hirit jam po ajo

që u harrua dikur a diku.

Unë s'kam m'su' me qa për f'minë,

madje as për gruan tashti.

Vonë është, vonë...

Oh, nanë! Pellgu i lotëve po lëvrin

nëpër mua t'heshtunën.

AH

Dhe ah!

E ngjeshur mungese, kjo ditë feste.

Davaritem kujtimesh:

- Të ikurit me të vdekurit,

të humburit me të shenj'tit;

po pse, pse të jet'shmit larg të gjallëve?!

Po të ishte...

Eh, po të ishte qyteti im

dhe lagjja ime e fundit, e fundmja strehë,

(shtëpia ime) guaca jonë e artë,

..e kjo lutje e fundit.

Pritja

Pritja s'ka të bëjë me kohën,

ka zemberekun e vet.

Më nuk i numrojmë kambanat e kishës së vjetër

se asgjë s'po përputhet me treguesit e plumbtët.

Motmoti u zharg orbitës së gjatë

e kalendari n'ditje po zbehet nikotinë,

ndoshta dhe pritja a mërzitë

e ne akoma su mërzitëm:

duke pritur!

..e po ndrrohen stinët,

po ikin dhe vitet e djegshme;

por në s'ditëm për të pritë,

si do të msonim ndryshe-me dashtë

deri në dhimbje.

Kapronjtë

Mbaj mend

rrezatimin e hënës ndërmjet degëpishave

dhe fërshfërimën e blenit t'flokut nëpër gushë.

(Aq largë shpie flladi i pranverës!)

..Hapat balerinë pas trokthit të një drenushe

shteg'humbur,

turbullirave të pyllit një mijë çudirash,

dhe rr'zimi i brishtësisë, para vështrimit gjuetari,

gjatë do t'mbahen mend.

(-Si nuk e vrave?!).

..pëllëmbën mbi trokllimën e trembur nën gëzof,

ngrohtësi erëmali,ndjellje as në ndjekje, athua t'kujtohet?

Apo harrove kapronjën që kishte një jetë në ikje,

e ma s't'u shqit', derisa një vjeshte...

U zhyt pylli mjegullinave,

e pas çdo trungu kishte nga një hije,

ku secila ngjante pak e më pak në ty.

Të priti gjatë nën një pishë.

Eh, su gjetët ma kurrë,

e trishtimi ndoqi trokthet bashkë me erën,

pa e ditur n'i largohet m'shirës a dashurisë.

(Ç'i dha ngrohtësia e dorës një kapronje aq të egër?!)

Mbaj mend e kujtoj...e nata pa hanë;

lëkurës m'i rrënqethet një freski fëshfërime,

dhe e plogësht bie brymnaja mbi blenin e flokut

si lotët e drenushës nën degët e k'saj pishe.

Kapronjtë